Мектеп директорының баяндамасы

Мектептің оқу үрдісін басқарудағы менеджмент

Садабаева Жибек Атагелдиевна

№47 орта мектеп

Қордай ауылы, Қордай ауданы, Жамбыл облысы

Қазіргі қарбалас заманда уақытты тиімді пайдалану тиімді жұмыс жүргізудің алғы шарттарының бірі. Бүгінгі күндегі педагогтің міндеті- сабақты ұйымдастыру, сынып сағаттарын ұйымдастыра білу, тапсырма беру платформаларын, бағдарламаларды, оқытудың жаңа технологияларын  меңгеру және тағы басқа жұмыстарға уақыт жеткізу. Қазіргі таңда білім беру саласында менеджмент айтарлықтай үлкен роль атқаратыны баршамызға белгілі. Менеджмент мектеп саласындағы үдерісті жоспарлау, ұйымдастыру, басқару, бақылауды білдіреді. Білім беруді басқару және жандандыру үшін мектеп басшысы қандай болуы керек? Әрине өз ісінің маманы болуы шарт. Педагогика мамандығын сүйіп, жүрегі мектептің қызметі үшін толассыз соғуы – білім беру саласындағы менеджменттің айрықша белгілері.                                                               

 Олай болса, уақытты басқару технологиясын білім беру ортасында қолдану өзекті деп санаймын. Педагог уақыттың құндылығын түсініп, оны тұрақты пайдаланудың тиімді әдісін табуы керек, бұл технология өз бетінше үйренуге, мақсаттар мен міндеттердің басымдықтарын анықтауға көмектеседі. Педагогтерге уақытты басқару бір жағынан өзін-өзі ұйымдастыру дағдыларын дамытуға және жетілдіруге, қымбат уақытын жоғалтпауға, демалуға көбірек бос уақыт табуға, осылайша шаршау, депрессия, стресс, кәсіби деформация сияқты жағымсыз салдардан арылуға көмектеседі. Екінші жағынан, мұғалімдер алған білімдерін оқушыларды оқыту үшін қолдана алады.                                                                   

Мектепті басқару үшін мұғалімдіктен бастап, жоғары сатыларға қарай үздіксіз дамып  отырып, ұйымдастырудың қыры мен сырын терең меңгеру қажет. Оқу-тәрбие, әдістеме жұмыстары, ата-аналармен қарым-қатынас, ұжымымен тіл табыса білу, шаруашылық, қаржы мәселелері, әкімшілік талаптар мен нұсқауларын оңтайлы шешу – директордан жан-жақты сауаттылықты, біліктілікті талап етеді.                                                                

 Күн сайын өзгеріп отыратын қоғамда мектеп қызметін заман ағымына сәйкес тиімді ұйымдастыру – қызметкерлерді тұлға ретінде құрметтеп, сенім артуға, кәсіби мүмкіндіктерін дамытуға, мектепішілік мәдениетті жоғарылатуға, білім беру стандарттарын, жалпы адамзаттық және ұлттық стандарттарды игеруге, дербес жауапкершілікті қалыптастыруға тікелей байланысты. Осыған орай, қарым-қатынасты басқарудың басқа төрт функциясында да «жоспарлау, ұйымдастыру, ынталандыру және бақылау» мәселесі өте маңызды. Тез тіл табыса алушылық – тиімді менеджер үшін жетекші және өте қажетті қабілет болып табылады. Себебі, ұжымда қанша қызметкер болса, сонша түрлі ой, мінез, көзқарас болатыны сөзсіз. Менеджерлердің жиынтық қызметі іс жүзінде жалпы мектеп қызметінің сәттілігін немесе сәтсіздігін анықтайды. Кадрларды қалыптастыруда адамдар арасындағы қарым-қатынас жүйесін, оның ішінде ұжымдық еңбек процесін орнатуда да менеджменттің рөлі зор. Сондықтан мектеп басшыларын «ұстаздардың ұстазы» деп те айтуға болады. Осыған байланысты оқу орнындағы менеджменттің маңызды міндеттерінің бірі мұғалімдердің дамуына ықпал ету болып табылады: құзыреттілікті арттыру, тұлғалық өсу, оның ішінде адамгершілік рухани даму.                                                                                                                 

    Топ-менеджерлер – мектеп директоры, мектеп директорының орынбасарлары өздері құзыреттіліктің жоғары деңгейіне және жалпы мәдениеттің жоғары деңгейіне ие болулары тиіс. Мәселен, бекітілген жоспар бойынша мұғалімдерді ынталандыра отырып, сапалы жұмыс істеуге бағыт-бағдар беріп отырамыз. Семинар, дөңгелек үстел, коучинг тағы басқа да іс-шараларда да менеджмент мәселесі қарастырылады. Жағдаяаттарды дер кезінде аңғарып, оған орай оң нәтиже беретін шешімдер қабылдауға тырысамыз.                                                                                     

Мақсатқа жету үшін жағдаяттарды шешудің, дамытудың бірнеше нұсқаларын жасау, оның ішінде жағдаяттың жағымды және жағымсыз тұстары, менеджерлер мен мұғалімдердің әрекеттері алдын ала жоспарлау, тиімді нәтижеге қол жеткізудің айғағы. Ынталандыру қағидатының негізгі тетігі де қарым-қатынас болып табылады, онда коммуникацияның міндеті – шабыттандыру, қолдау, оң көзқарас білдіру, мұғалімдер мен оқушылардың нәтижелері туралы келешек көзқарасты талқылауда маңызды роль атқарады.                                                                                               

      Қазіргі заманғы менеджменттің күші, бір жағынан, адамның білімін, тәжірибесін және ғылыми-техникалық прогрестің жетістіктерін өнімді күшке, ал екінші жағынан – шығармашылық пен инновациялық процестерді бастайтын қызметкерлердің ақпараттық әлеуетін арттыруға ықпал ететін ақпараттық технологияларды қолдануға мүмкіндік береді және оқу үрдісінде жалғасын табады.